Чыамайыкылыы оһуохайы дьоҥҥо-сэргэҕэ биллэрэр, өрө тутар, үйэтитэр, баар үгэһи салгыыр, сайыннарар сыаллаах ыытыллыбыт күрэххэ барыта 4 кыттааччы үлэтэ киирдэ.

Дьүүллүүр сүбэ мустан күрэх кыттааччылара
Чыамайыкыбыт оһуохайын уратытын төһө көрдөрбүттэрин, үлэ тыла-өһө хомоҕойун, уранын, оһуокай тэтимигэр сөп түбэһиитин, ис хоһоонун, кээмэйин, ирдэбилгэ сөп түбэһиитин барытын сыныйан көрдө уонна маннык санааҕа кэллэ:

КЫЛААН КЫАЙЫЫЛААҔЫНАН 🏆быйылгы сыллаах күрэххэ Чыамайыкылыы оһуокай пропагандиһа, үҥкүү тылын таһаарааччы, сыана, култуура бэтэрээнэ, СӨ Култууратын туйгуна Раиса Афанасьевна Брызгалова ааттанна уонна күрэх спонсордара, Евдокия Павловна Куприянова оҕолоро, сиэннэрэ туруорбут сүрүн бириистэрин 10.000 солк. уу харчынан наҕараадаланна👏👏👏
Эҕэрдэлиибит! 💐

Кыттааччыларбытыгар маннык Анал ааттары туттарабыт: 🎁

«ДОЙДУГА ТАПТАЛ» анал аат уонна СР үөрэҕириитин туйгуна, СР педагогическай династия бэлиэ хаһаайына, культура уонна спорт эстафетатын хас да төгүллээх лауреата, дипломана, чабырҕахсыт, оһуокайдьыт Раиса Валерьевна Ноева аатынан оҕолоро, сиэннэрэ туруорбут анал бириистэрэ — өрүү кыттар, өйүүр биир дойдулаахпытыгар, Мэҥэ-Хаҥалас улууһун Мэҥэ Аат бэлиэ хаһаайкатыгар, Майа нэһилиэгин бочуоттаах олохтооҕор, сыана бэтэрээнигэр Алексеева Марфа Васильевнаҕа ананна.
«УМСУЛҔАННААХ УРАН ТЫЛ» анал аат — Никитина Светланаҕа-Сыгыйык, «Таммахтар» литературнай түмсүү чилиэнигэр, Майа нэһилиэгэ, кийииппитигэр.
«ТҮӨЛБЭ ОҺУОКАЙЫН ӨЙӨӨЧЧҮ» анал аат — Наталия Пахомоваҕа-Кыллайа, Ходоро нэһилиэгэ, культура уонна духуобунай сайдыы управлениетын специалиһыгар.
В. И. Кононов аатынан «Тамма» култуура киинин бириистэрэ ананнылар👏🎁🎁

БУКА БАРЫ КЫТТААЧЧЫЛАРБЫТЫГАР ТЭРИЙЭЭЧЧИЛЭР ААТТАРЫТТАН МАХТАНАБЫТ !

Дьүүллүүр сүбэ:
Алексеева Т.Р., С.Н.Михайлов аатынан оскуола учуутала, «Кыраһа» айар дьоҕурдаахтар түмсүүлэрин кыттыылааҕа,
Архипова Е.А., тыл үөрэхтээҕэ, Чыамайыкылыы оһуокай түмсүүтүн төрүттээччи,
Сидорова Н.В., улуустааҕы кииннэммит библиотекатын библиограба,
Куприянова У.И. — күрэх идеятын ааптара, женсовет салайааччыта,
Васильева А.М. — В. И. Кононов аатынан «Тамма» култуура киинин уус-уран салайааччыта.