Олунньу 23 күнүгэр, Аҕа дойдуну көмүскээччилэр күннэригэр Даркылаах сириттэн эстафета былааҕа Ходоролорго тиксэрилиннэ. Чыамайыкылар олус элбэх буолан хомуллан кэлэн, спортка доҕордуу көрсүһүүгэ, бырааһынньыкка сөп түбэһиннэрэн тэҥнэһии буолла. Хас биирдии нэһилиэк 17,5 очукуону суруннулар.
Чыамайыкы нэһилиэгин уус-уран самодеятельноһын кэнсиэригэр ирдэбилгэ киирбит нүөмэрдэр бары киирбиттэр. Төһө да ыраах тайаан сытар нэһилиэк буоллар, дьон сэргэ хото кыттыыта кэнсиэри сэргэхситтэ. Орто саастаах, сири — дойдуну хамсатар күүстээх нэһилиэнньэ хас биирдии нүөмэр ахсын хото кыттан, кэнсиэргэ кыттар биир дойдулаахтара ытыс тыаһынан айхаллаатылар.
Түмүккэ дипломант аата «Дэйбиирдээх үҥкүүгэ», Захаровтар дьиэ кэргэн олоҥхону толорууларыгар, кырыымпаҕа төрүт дорҕоон дьүһүйүүтүгэр, Владимир Яковлев солотыгар, уус-уран ааҕыы бөлөҕөр, «Мээнэ дьон» көр-күлүү бөлөҕүн тэттик сценкаларыгар иҥэрилиннэ.
Лауреаттарынан Раиса Брызгалова тойуга, Геннадий Филиппов солота, «Чаҕылыс» бөлөх чабырҕаҕа, «Мээнэ дьон» көр-күлүү бөлөҕүн «Булчуттар» сценката, Вячеслав Перевалов хомуска төрүт дорҕоонноро буоллулар. Чыамайыкылар кэнсиэрдэр 4,05 баалга сыаналанна.
Чыамайыкы — кэрэмэс кэскиллээх нэһилиэк. Төһө да ыраах сытарын иһин эдэр дьон олохсуйар, саҥа дьыаланы арынан, сүөһү-ас дэлэйэр. Кэлэр сылга, арыый кыаллыбатах жанрдарга тустаах болҕомтону ууран, эбии күүс буолар специалистары кытары үлэлэһэн өссө да сайдар, кыахтанар кэскиллээхтэр.

Галия Сосина, Мэҥэ Хаҥалас улууһун култуураҕа уонна духуобунай сайдыыга салалтатын Информационнай методическай киинин салайааччыта, дьүүллүүр сүбэ бэрэссэдээтэлэ