Муус устар 5 күнүгэр нэһилиэкпитигэр биир бэлиэ күн буолла, ол курдук ытык аҕам саастаах биир дойдулаахпыт Семенова Дария Гаврильевна туһунан кинигэ сүрэхтэнэр үөрүүлээх тэрээһинэ ыытылынна. Оҕолоро, сиэттэрэ, олохтоохтор мустан олус истиҥ көрсүһүү тэрийдилэр, нэһилиэк баһылыга А.П.Захаров Дария Гаврильевнаҕа дойдубут бэрэсидьиэнэ В.В.Путин аатыттан Улуу Кыайыы 80 сылыгар аналлаах кыайыы мэтээлин үөрүүлээх түгэҥҥэ туттарда. Сиһилии хос сиэнэ, «Проба пера» юнкора Романова Настя суруйбут ыстатыйатын ааҕаргытыгар:
«Дьоллоох олоҕум кэрэһиттэрэ оҕолорум, сиэннэрим миэннэрэ… Муус устар 5 кунугэр тапталлаах эбээбит Семенова Дария Гаврильевна туһунан кыра кыыһа Васильева Аграфена Егоровна уонна улахан сиэнэ Иванова Тамара Афанасьевна хомуйан оҥорбут «Ийэбит алгыһынан арчыланан…» диэн кинигэлэрин сүрэхтэниитэ буолан ааста.
Хос эбэм 1927 сыллаахха муус устар 1 күнүгэр күн сирин көрбүт. Кини 9 оҕо амарах ийэтэ, элбэх сиэннээх, хос сиэннээх. Бу соторутааҕыта 98 сааһын томточчу туолбута.
Тэрээһиҥҥэ аймахтар, нэһилиэк олохтоохторо, баһылык Захаров А.П. кытыннылар. Васильева А.Е., Иванова Т.А. кинигэ хайдах оҥоһуллубутун кэпсээтилэр. Оҕолор, сиэттэр ыллаатылар, хоһоон аахтылар. Чугас дьоно эбээбит туһунан араас түгэннэри кэпсээн сэргэхситтилэр.
Кинигэҕэ Чыамайыкы нэһилиэгин ытык кырдьаҕаһа, нэһилиэк бочуоттаах олохтооҕо, элбэх оҕолоох тапталлаах ийэ, эбэ, хос эбэ Дария Гаврильевна олоҕун, дьоҥҥо-сэргэҕэ сыһыанын, оҕолорун иитиитигэр кыһамньытын, кинилэргэ ис сүрэҕиттэн күүстээх тапталын туһунан кэпсэнэр. Кини үтүө майгыта, эйэҕэс сыһыана оҕолорун, сиэннэрин санааларыгар, ис дууһаларыгар туохха да тэҥнэммэт үтүө өйдөбүл буолан уостан уоска тиһиллэн, үйэлэргэ кэлэр кэнчээри ыччаппытыгар кэрэ кэпсээн буолара саарбаҕа суох.
Ытык киһибит туһунан чугас дьонун, аймахтарын, оҕолорун, сиэннэрин ахтыылара, олоҕун үйэтитэр хаартыскалар, видеоматырыйааллар киирдилэр.
Хос эбээм туһунан кинигэ 5 түһүмэхтэн турар.
1 түһүмэх: Өбүгэлэрбит ситимнэрэ быстыбат.
Бу түһүмэххэ эбээбит туһунан, кини төрөппүттэрин, бииргэ төрөөбүттэрин уонна наҕараадаларын туһунан суруллубут.
2 түһүмэх: Күн сирин көрдөрбүт көмүс чыычаахтара — оҕолоро.
Манна эбэм 9 оҕотун туһунан, кинилэр үлэлэрэ, ситиһиилэрэ киирбит.
3 түһүмэх: Дьиҥнээхтик таптаһар дьонтон төрөөбүт оҕолор — дьоллоохтор.
Бу түһүмэххэ оҕолоро ийэлэрин, сиэннэр эбээлэрин туһунан ахтыылара ыалларынан наардаммыт, үгүс хаартыскалаах.
4 түһүмэх: Хаан-уруу аймахтарбыт, чугас дьоммут.
Манна аймахтарбыт, эбэбин чугастык билэр дьон ахтыылара киирбит.
5 түһүмэх: Кэлэр кэнчээри ыччаппытын өйөөн.
2010 сылтан саҕалаан, үөрэх дьылын түмүгүнэн оскуолабыт бастыҥ үөрэнээччитигэр, учууталга, техүлэһиккэ бэриллэр Семенов Егор Павлович аатынан эбээбит, кини оҕолоро кэргэттэринээн уонна учуутал сиэннэрэ туруорбут стипендияларын ким ылбытын бу түһүмэххэ билиэххэ сөп.
Тэрээһин кэннэ нэһилиэк баһылыга Захаров А.П. Улуу Кыайыы 80 юбилейдаах сылыгар аналлаах кыайыы мэтээлин Семенова Дария Гаврильевнаҕа оҕолорун, сиэннэрин ортотугар туттарда.
Романова Настя 9 кылаас, «Проба пера» юнкора.»