Бүгүн, олунньу 7 күнүгэр, Чыамайыкы нэһилиэгэр — Эр дьон сылын арыйар үөрүүлээх тэрээһинэ ыытылынна. Тэрээһин оскуола улахан кылаас уолаттарын толоруутугар «Эр хоһуун» ырыанан арылынна. Нэһилиэк баһылыга А.П.Захаров мустубут эр дьоҥҥо, уолаттарга эҕэрдэ тылын, ылыллыбыт былааннары, бу сылга турар сыалы-соругу иһитиннэрдэ, түмсүүлээх, көхтөөх буолуоҕуҥ диэн ыҥырда. Ыраахтан ыҥырыллыбыт ыалдьыппыт уйулҕаһыт, алгысчыт Баайаҕантай Кулан хаан Сэргэй уола алгыс сиэрин-туомун толордо, уол оҕону иитии, эр киһи саха итэҕэллээх, бөҕө тирэхтээх буоларын тула аһаҕас кэпсэтии ыытта, бэйэтин көрүүтүн үллэһиннэ. Ол кэннэ, эр дьону сомоҕолуур, түмэр эр дьон оһуохайа тэрилиннэ, оһуохайы таһаардылар «Саха сирин үтүөлээх этээччитэ» анал аат хаһаайына Егор Евсеевич Куприянов, эдэр, кэскиллээх этээччи Айтал Макаров. Бу курдук, уопсастыбаҕа эр киһи, аҕа оруолун үрдэтэр сыаллаах Эр дьон сыла саҕаланна, сыл устата тэрээһиннээхтик, өрө көтөҕүүлээхтик, күргүөмнээхтик ааһыа диэн эрэнэбит.